CURSO
O Merza Percusión é un curso, unha proposta educativa, de desfrute, coñecemento e perfeccionamento da percusión que en 2021 celebra a súa 16ª edición do 26 ao 29 de xullo.
No concello de Agolada creamos un contexto natural e relaxado para que xóvenes e artistas nacionais e internacionais aprendan, se divirtan e medren como persoas a través da percusión.
Poden participar no Merza Percusión alumnas e alumnos a partir de nove anos que estean cursando estudos de percusión, ben sexa en escolas de música ou conservatorios en grao elemental e profesional. Este ano contará cun alumnado limitado a 48 participantes o Merza Percusión de sempre e 24 o Merza Avanzado.
O curso terá unha duración de catro días e haberá a posibilidade de solicitar aloxamento e manutención.
A benvida aos alumnos será o domingo 25 de xullo pola tarde, entre as 18:00 e as 19:30 horas no colexio de Agolada. O primeiro día de clase será o luns 26 de xullo e o último o xoves 29 de xullo, xornada que despedirá o Merza Percusión co espectáculo final no que participarán todos os alumnos e alumnas.
